7ª reunión do club de cómic tradicional.

Brutal. Unha historia que engancha dende o primeiro momento. Gustoulles moito. Ainda que non é un cómic para falar durante horas, é unha lectura trepidante. Os alumnos tamén puxeron en valor o debuxo, con moita personalidade.
L é unha rapaza que chegou hoxe nova ao noso club. Di que non lle gusta o cómic, pero vir un pouco por ver e porque veñen os seus amigos. Vai ler El hombre garabateado. A ver qué lle parece.

6ª reunión do club de cómic tradicional.

Esta reunión falamos de Fun House de Alison Bechdel. Decidimos abandonar esta lectura porque non está a funcionar. Resúltalles pesada e non acaban de entrar na historia. A linguaxe e os temas tratados non acaban de enganchalos. Como a finalidade dos clubs de lectura é o fomento da lectura, decido cambiala. Non ten sentido obrigar aos rapaces a ler algo que non lles gusta. Ao club de lectura se ven  a disfrutar, non a sufrir. O cómic elexido para substituir a Fun House é El hombre garabateado. É un cambio de rexistro total. Imos cara un thriller trepidantes. A ver que pasa.

5ª reunión do club de cómic tradicional

Xa rematamos o libro. Aínda que nos gustou moito, non da tanto xogo como Persépole. O membros do club están bastante calados durante a reunión porque non teñen moito que dicir. A algún non lle convencen os debuxos. "Son un pouco trapalleiros", dixo.
Esta vez a reunión remata antes de que toque o timbre porque non hai moito que dicir.
Quedamos en ler Fun Home e ter lida a metade deste cómic para a próxima reunión.

4ª reunión do club de cómic tradicional

Despois de Persépole, voltamos a carga con Maus.

Unha historia moi triste, pero que reflicte moi ben unha época terrible da historia de humanidade. Agás unha persoa, este cómic tivo moi boa acollida. Pero todos estamos de acordo en que non é Persépole. Non ten tantos matices. É normal, porque o autor tiña outra intención.

Quedamos para telo lido enteiro na próxima reunión.

3ª reunión do club de cómic tradicional

Outra reunión para falar de Persépole, porque na última quedaron tantas cousas por comentar...

Todos estamos de acordo en que é un cómic moi rico, cheo de pequenos detalles. Falamos de papel da muller no Islam, da violencia, da intolerancia, da dificultade de adaptarse a un novo país, das raíces e da identificación coa nosa terra...

Outra vez toca o timbre e non podemos rematar. Unha mágoa.

2º reunión do club de cómic tradicional.

Esta reunión deunos para falar de varios temas.

a) A revolución iraní.

b) Machismo.

c) Emigración.

E outros moitos que se quedaron por falar porque tocou o timbre.

Malia que todos os membros do club xa leron o còmic enteiro, quedamos para a próxima reunión e falar de Persépole, porque ten tantas cousas que comentar que nun recreo non chega.

Primeira reunión do club de lectura de cómic tradicional para adultos. Somos dez.
Nesta primeira reunión debatimos sobre que cómic imos ler primeiro. Só houbo unha proposta por parte do alumnado, que foi The Umbrella Academy, pero foi desestimada porque non é un cómic para adultos, senon, máis ben, unha historia de superheroes un tanto disfuncionais. Ainda que hai historias de superheroes para adultos, coma a maioría das revisións que se están a facer agora -o pioneiro foi Fran Miller con Batman-, non é o caso de The Umbrella Academy. Ademáis, agora están a botar a adaptación do cómic a serie en Netflix e algúns dos participantes no club xa a viron e prefiren algo completamente novo para eles.
Outro problema importante que temos para elexir un cómic é o idioma. En galego non hai moitos cómics con certa calidade -nin de producción propia, nin traduccións-. Ao final optamos por Persépole.